NMMS స్కాలర్షిప్ సాధించిన విద్యార్థులకు అభినందనలు తెలిపిన జేడీ ఫౌండేషన్

16-04-2026: గోపాలపట్నం జిల్లా పరిషత్ బాలికోన్నత పాఠశాలలో నేషనల్ మీన్స్ అండ్ మెరిట్ స్కాలర్షిప్ (NMMS) పరీక్షలో ఉత్తీర్ణత సాధించిన విద్యార్థులను జేడీ ఫౌండేషన్ ఆధ్వర్యంలో అభినందించి, ప్రోత్సాహక బహుమతులు అందజేశారు.

డిసెంబర్ నెలలో నిర్వహించిన NMMS పరీక్షకు విద్యార్థులు మెరుగైన సన్నద్ధతతో హాజరయ్యేందుకు జేడీ ఫౌండేషన్ ప్రత్యేకంగా ట్యూటర్‌ను ఏర్పాటు చేసి శిక్షణ అందించింది. ఫౌండేషన్ సహకారంతో విద్యార్థులు కృషి చేసి విజయాన్ని అందుకోవడం ఆనందదాయకమని సభ్యులు పేర్కొన్నారు.

విజయం సాధించిన ఆరుగురు విద్యార్థులను అభినందించి, వారి భవిష్యత్ విద్యాభ్యాసానికి ప్రోత్సాహంగా చిరు కానుకలు అందజేశారు. అలాగే విద్యార్థులకు శిక్షణ అందించిన ట్యూటర్ శ్రీ సురేష్ కుమార్ గారిని ప్రత్యేకంగా సత్కరించారు.

ఈ సందర్భంగా పాఠశాల ప్రధానోపాధ్యాయురాలు శ్రీమతి స్వర్ణలత గారు మాట్లాడుతూ, జేడీ ఫౌండేషన్ తమ పాఠశాలలో విద్యా మరియు పర్యావరణ రంగాలలో అనేక సేవా కార్యక్రమాలు నిర్వహిస్తోందని తెలిపారు. ముఖ్యంగా:

• పొలంబడి కార్యక్రమం
• విత్తన బంతుల (Seed Balls) కార్యక్రమం
• పెన్ డ్రాప్ బాక్స్‌ల ఏర్పాటు
• లైబ్రరీ అభివృద్ధి కార్యక్రమాలు
• NMMS ట్యూటర్ ఏర్పాటు

వంటి కార్యక్రమాలు విద్యార్థులకు ఎంతో ఉపయోగపడుతున్నాయని పేర్కొన్నారు.

అలాగే ఈ కార్యక్రమాలన్నింటికీ సహకరిస్తున్న జేడీ ఫౌండేషన్ ఛైర్మన్ శ్రీ వి.వి. లక్ష్మీనారాయణ గారికి ఆమె ప్రత్యేక కృతజ్ఞతలు తెలిపారు.

ఈ కార్యక్రమంలో జేడీ గ్రూప్ సభ్యులు, ఉపాధ్యాయులు, పాఠశాల సిబ్బంది మరియు విద్యార్థులు పాల్గొన్నారు.